भदौ १६ देखि ‘ब्रेकफेल”

नायिका ऋचा घिमिरेको नयाँ फिल्म ‘ब्रेकफेल’ को सार्वजनिक प्रदर्शन आगामी भदौ १६ गतेदेखि प्रारम्भ हुने भएको छ ।
शंकर घिमिरेको निर्देशन तयार भएको यो कमेडी फिल्म भदौ १६ गतेदेखि देशव्यापी रुपमा प्रदर्शन हुन लागेको हो । निकै छोटो समयमा तयार पारिएको यो फिल्ममा राजेश हमाल, ऋचा घिमिरे, विमलेश अधिकारी, निरज बराल, सुवास थापा, ममता प्रधान, शिवहरी कार्की आदि कलाकारले मुख्य भूमिका निर्वाह गरेका छन् । फिल्ममा किरण तथा मदन महतले नयाँ प्रस्तुतीको रुपमा अभिनय गरेका छन् ।
वल्र्डवाइड मुभि मेकरको प्रस्तुतिमा तयार पारिएको यो फिल्ममा सत्य-स्वरुप आचार्यले संगीत दिएका छन् । फिल्मको टाइटल गीतमा भने द यूनिटीका संगीतकर्मी सुदिन पोखरेल तथा आशिफ शाहले संगीत दिएका छन् । सुदुर पश्चिम नेपालका भर्जिन लोकेशनहरुका साथै काठमाडौं तथा चितवनमा छायांकन गरिएको यो फिल्ममा शिवहरी कार्की, मनोजकुमार घिमिरे तथा प्रदीप सिंह निर्माताको रुपमा रहेका छन् । नेपालमा प्रदर्शन भैसकेपछि यो फिल्मलाई यूरोपका विभिन्न देशका साथै अष्टे्लियामा समेत प्रदर्शन गरिने निर्देशक शंकर घिमिरे बताउँछन् ।